Catro partidos faltan para que remate a Liga na Terceira Autonómica na que a Unión Deportiva Ourense pode rematala con pleno de vitorias.
A última vítima dos unionistas foi o Cenlle ao que lle caeron sete goles na pasada xornada no estadio do Couto.
Chechu por partida dobre adiantaría aos locais para que Adolfo, de penalti, deixara o 3-0 co que se remataría a primeira metade.
Na reanudación foi Adolfo o que se encargaría de anotar o cuarto tanto para os locais. Roberto Almeida facía o quinto da tarde e Julio Salgado, o sétimo; entre medias Roberto Dacosta deixaría o momento máxico da tarde. O mediapunta lograba un gol olímpico, que supuña o sexto tanto.
Con sete a cero remataba un partido que afianzaba no liderato á UD. Os homes de Antonio Dacosta son líderes con 72 puntos.
Alirón
Esta fin de semana celébrase a xornada número 27. A UD Ourense visita ao Sporting Carballiño; de vencer proclamaríanse campións do grupo 13 da Terceira Autonómica. O equipo de Carballiño é cuarto con 48 puntos e está en plena loita pola terceira praza que lle daría o ascenso de categoría. Terceiro é Ribadavia Atlético, con 49.
UD Ourense e Palmés xa están ascendidos, polo que so falta saber que equipo os acompañará o ano que vén na Segunda Autonómica. Xunto con Ribadavia Atl. (terceiro) e Sp. Carballiño (cuarto) están na pugna polo ascenso o Barra de Miño, quinto con 47 e un partido menos e o Cenlle, sexto con 44.
