O obxectivo é que os rapaces adquiran destrezas nos seus autocoidados e hábitos de vida gañando en autonomía e autoestima.
Vinte nenos de entre 8 e 14 anos aprenden estes días en Muiños a convivir coa súa enfermidade e a compartir experiencias con outros rapaces que, como eles, teñen diabete, nun campamento organizado polo servizo de Endocrinoloxía do Complexo Hospitalario Universitario de Ourense e a Asociación Diabética Aurea.
O obxectivo desta iniciativa é promover a autonomía e autoestima dos rapaces con diabete potenciando a convivenza cos compañeiros e aprendendo a resolver problemas e situacións do día a día, ademais de desfrutar da natureza e realizar todo tipo de actividades de lecer, fomentando os hábitos saudables. As xornadas de convivencia en Muiños comezaron o pasado domingo e prolongaranse ata este venres 26.
Ao longo desta semana os rapaces están acompañados por tres médicos, dúas enfermeiras, cinco monitores, deles dous de tempo libre e tres con diabete.
