A CIG convoca a manifestarse contra o Tratado Comercial entre a Unión Europea e os Estados Unidos, ás 12 horas, fronte á Subdelegación do Goberno.
O sindicato CIG súmase ás convocatorias para este sábado 17 de outubro que hai en toda Europa contra o Tratado Comercial entre a Unión Europea e os Estados Unidos (TTIP) que, ao seu ver, «ameaza a democracia e os dereitos da clase traballadora». En Ourense a concentración terá lugar ás 12 do mediodía diante da Subdelegación do Goberno e nela reclamarase a non aprobación do tratado.
Segundo o sindicato, o TTIP supón «un desregulamento das relacións laborais e a clase traballadora resulta sacrificada para aumentar os beneficios das multinacionais, aumentan as privatizacións, os Estados perden a súa soberanía de poder decidir sobre os seus recursos e sen que os parlamentos dos paises afectados poidan pronunciarse ao respecto deste tratado negociado en segredo, tamen afecta á supresión das lexislacións nacionais e a limitación de intervención na economíia, agravando a nosa dependencia como país. De igual xeito revisarán a protección da natureza, a seguridade alimentar, productos farmacéuticos……..»
En definitiva, o sindicato considera o tratado «un golpe de estado aos noso dereitos, máis explotación, menos dereitos, menos democracia» e por iso chama á mobilización este sábado.
