A maior feira científica de Galicia celébrase entre o 18 e o 20 de novembro na Tecnópole con 74 investigacións e enxeños.
Unha carrilana de tecnoloxía punta, unha plataforma de compravenda de produtos agrícolas sen intermediarios, un bastón robotizado para invidentes e un espantallo móbil para viñas son só algúns dos proxectos cos que a Galiciencia celebra este ano o seu décimo aniversario. Nesta edición especial expoñerase unha cifra récord de proxectos: un total de 74 investigacións e enxeños de equipos procedentes de toda Galicia, Euskadi e Cataluña. Con esta edición superaranse os 20.000 visitantes e acadaranse os 500 proxectos expostos en total ao longo da traxectoria do evento.
Durante os días 18, 19 e 20 de novembro a entidade organizadora, Parque Tecnolóxico de Galicia –Tecnópole-, reforza a organización de actividades paralelas e consolida a experiencia piloto testada o ano pasado para dar entrada a proxectos de Primaria. É así como a carpa na que os equipos participantes mostrarán ao público os seus proxectos científicos e de innovación lle dará cabida a 52 proxectos de Secundaria e 22 de Primaria, estes últimos fóra de competición.
A previsión de visitas de grupos escolares de toda Galicia supera as 2.000, ás que se sumarán as persoas que acudan pola súa conta, xa que a feira é de entrada libre para particulares e familias polas tardes. A exposición de proxectos permanecerá aberta de 10 a 13 horas pola mañá e de 15 a 18 horas pola tarde.
No evento, que conta coa colaboración da Consellería de Economía, Emprego e Industria, os participantes competirán por situarse entre os tres finalistas e o que consiga a maior puntuación levará o primeiro premio, dotado con 1.000 euros para financiar a súa participación na maior feira científica a nivel estatal, a Exporecerca 2016.
Talleres e unha gran tarta de aniversario
Entre as actividades paralelas inclúese a conmemoración do Ano Internacional da Luz e das Tecnoloxías baseadas na Luz a través de catro talleres orientados a diferentes idades. Ademais, esta será tamén a temática da exposición instalada polo Consello Superior de Investigacións Científicas (CSIC) e da charla que poderá seguirse online desde calquera centro educativo de Galicia grazas á súa retransmisión en streaming.
Os máis pequenos terán a ocasión de mergullarse no mundo da robótica a través doutro obradoiro e todos os que visiten a Galiciencia poderán percorrer os dez anos do evento a través dunha exposición de fotografía na que se recollen os mellores momentos.
Durante a clausura, ademais da entrega de premios aos mellores proxectos e ao gañador do concurso de fotografía científica convocado no marco do certame, todos os participantes soprarán as candeas dunha gran tarta para festexar o décimo aniversario da Galiciencia.
