Os candidatos á presidencia do Partido Popular en Ourense cidade, Jesús Vázquez e Miguel Abad, acordaron concorrer ao congreso local previsto para o próximo 16 de abril nunha única candidatura.
Así o decidiron nunha reunión celebrada na sede popular e que foi promovida polo presidente provincial, Manuel Baltar, quen transmitiu a ambos os candidatos a necesidade de sumar esforzos para reconstruír un partido forte na cidade e xerar novas expectativas entre afiliados e simpatizantes, aspectos tamén básicos nas dúas candidaturas.
Como resultado desta reunión, ao congreso popular de Ourense cidade só se presentará unha única lista que estará integrada por Jesús Vázquez como candidato á presidencia e Miguel Abad como responsable de organización da formación local.
O comité organizador do congreso procederá á proclamación do candidato o próximo día 28, logo de comprobar a presentación de avais.
