Son de Trives súmase ás demandas realizadas polos membros da asociación de nais e pais do alumnado do Centro de Educación Especial Miño, de Velle, en Ourense ante as diferentes administracións públicas respecto á dotación dun centro público de continuidade para persoas con diversidade funcional na provincia.
Ourense é a única provincia de Galicia que non conta cun centro destas características, polo que, a partir dos 21 anos, idade na que finaliza o período escolar nos centros de educación especial, moitas persoas non poden continuar coa súa formación, ao non ter un centro público de continuidade, que dispoña de prazas de día nin residenciais para quenes non poidan residir no seu domicilio.
Ante esta situación, desde Son de Trives participan e organizan activamente no seu territorio a recollida de sinaturas que están a levar a cabo desde a Plataforma PROCAPD. Así, repartirán por distintos locais públicos follas para que quen o desexe poida asinar e colaborar para conseguir un centro público destas características en Ourense.
