Con motivo da conmemoración do Día Universal dos Dereitos da Infancia o 20 de novembro, Cruz Vermella convidará aos ourensáns a colaborar co programa de Acollemento Familiar, lembrando o dereito de todos os menores a vivir en familia. Para iso achegará o programa a través dunha mesa informativa na rúa do Paseo (o venres de 11:30 a 13:30 horas) e un obradoiro de manualidades no Centro Comercial Pontevella (sábado de 17:30 a 20:30 horas).
Cruz Vermella xestiona en Ourense o programa «Familias Acolledoras» en colaboración coa Consellería de Traballo e Benestar da Xunta de Galicia dende 1996. Ao longo destes anos 298 menores teñen sido acollidos na nosa provincia.
Atopar a familia acolledora idónea para os casos de adolescentes, así como de grupos de irmáns ou de menores con algún tipo de enfermidade soe ser o máis complicado. Neste momento Cruz Vermella conta en Ourense con 37 familias acolledoras, pero é preciso que máis familias entren a formar parte do programa para atender as necesidades de novos casos, especialmente para acollementos de bebés de entre 0-3 anos, acollementos de longa duración de adolescentes e preadolescentes, así como de grupos de irmáns.
Para ampliar a rede de familias, nos últimos meses Cruz Vermella desenvolveu a campaña «En familia», por dereito que pretende chamar a atención sobre o dereito que teñen os nenos e nenas a vivir en familia, a ser protexidos, e recibir coidados, educación e amor.
