Este xoves pecharase o Nadal en Ourense. E o fará coa tradicional cabalgata de Reis e cun novidoso espectáculo de fogos artificiais.
As súas maxestades chegarán á estación de tren Empalme ás 18:00 horas, e desde alí iniciarán un percorrido polas rúas da cidade atravesando a avenida das Caldas, a ponte Romana, Progreso, e Doutor Marañón para, ás oito do serán, facer a entrada na Praza Maior.
O séquito real estará composto por preto de 300 persoas entre animación e figurantes, que irán sobre as súas carrozas e animando a todos os ourensáns que se acheguen ao percorrido.
Fogos artificiais
Os actos pecharanse cun espectáculo pirotécnico. Así, desde a marxe dereita do río Miño, a pirotecnia Josman realizará unha pioneira demostración de luz e cor que lle porá o broche á xornada máis entrañable das festas do Nadal.
Por este motivo, a rúa Ribeiriño manterá pechada desde mediados da tarde por motivos de seguridade. A Policía Local manterá igualmente un dispositivo de control para que o público non invada a estrada N-120 durante o espectáculo pirotécnico.
Alerta
O nivel 4 de alerta antiterrorista, decretado no conxunto do estado no mes de decembro, fará que a Policía Local e a Policía Nacional estean coordinadas para o normal desenvolvemento das actividades baixo a máxima seguridade.
Cortes de tráfico: itinerarios alternativos no barrio da Ponte.
A Policía Local recoméndalle aos condutores que traten de evitar o acceso ao percorrido da Cabalgata, xa que haberá diversas rúas pechadas por tal motivo. O primeiro corte de tráfico producirase ás 17:00 horas no barrio da Ponte: anularase o acceso á avenida das Caldas e xa non se poderá acceder á explanada da estación de tren. Algúns dos itinerarios alternativos propostos pola Policía Local son os seguintes: a circulación que proveña da estrada de Vigo (N-120) ou de Madrid (N-525) cara a Santiago terá que acceder pola estrada de Monforte (N-120) e viceversa.
A circulación que baixe pola avenida de Santiago deberá acceder á avenida de Marín e Ponte Nova. Cando a cabalgata cruce a ponte romana abrirase o tráfico nos tramos descritos.
Cortes de tráfico: itinerarios alternativos no centro da cidade
Pouco antes das 18:00 horas pecharase ao tráfico rodado o resto do itinerario. Por iso, debe evitarse circular desde o Xardín en sentido centro cidade ou acceder á rúa Progreso desde o Pavillón dos Remedios, avenida da Habana, Sáenz Diez, Juan XXIII ou Parada Justel. Os itinerarios alternativos son amplos, tanto por San Francisco, Couto ou Centro Cidade a través de Curros Enríquez.
Do mesmo xeito, retiraranse os veladores instalados na rúa Progreso para o mellor tránsito do público, volvendo todo á normalidade logo de que os servizos de limpeza recollan o lixo da cabalgata.
