Do 12 de agosto ao 21 de agosto, 173 artistas dos seis grupos actuarán no Barco de Valdeorras, Celanova, Maceda, Verín, Entrimo, Viana, A Rúa, Allariz, Trives, Carballiño, Castro Caldelas, Xinzo, Manzaneda, Bande, ademais de Ourense cidade e Ribadavia.
As Xornadas de Folclore volven un ano máis á provincia nun dos eventos máis esperados do verán cultural ourensán, que nesta 39 edición contará coa participación de seis agrupacións folclóricas procedentes de Colombia, México, Panamá, Serbia, Senegal e Taiwán.
O vicepresidente segundo da Deputación, César Fernández; o director xeral de Cultura da Xunta de Galicia, Anxo Lorenzo; e o director das xornadas, Julio Fernández Senra, explicaron no Pazo Provincial os detalles dun evento que se celebra en Ourense desde o ano 1984.
César Fernández destacou na súa intervención a importante resposta do público, cunha media aproximada de 25.000 espectadores grazas a ese carácter itinerante pola provincia, permitindo coñecer as manifestacións folclóricas doutras culturas, “sempre moi enriquecedor para unha terra como Ourense, tamén cunha tradición folclórica e etnográfica moi importante”.
Un festival “de máxima calidade” do que destacou ademais a cooperación institucional a través da “colaboración permanente” da Xunta de Galicia, agradecendo tamén ao director das xornadas e a toda a organización o enorme traballo para lograr a “excelencia artística”.
Pola súa parte, Anxo Lorenzo subliñou que con estas xornadas enriquécese o panorama galego, “xa de por si rico”, de manifestacións do folclore da cultura tradicional, ofrecendo cada ano unha visión do folclore doutras partes do mundo, o que resulta “todo un luxo e un privilexio”. Felicitou ademais á Deputación e á organización por apostar pola descentralización da cultura, ao facer chegar estas xornadas a case unha vintena de puntos da provincia.
Xulio Fernández quixo recoñecer o gran labor que hai detrás deste evento, citando a coordinación de Xabier Álvarez, aos guías e voluntarios que traballarán a diario cos máis de 170 artistas que actuarán na provincia, aos directores dos centros de acollida e “a implicación da cidadanía nun espectáculo de máximo nivel e de referencia en España”.
Dous espectáculos por noite en dúas vilas da provincia
A Deputación de Ourense, a través do Centro de Cultura Popular Xaquín Lorenzo, organiza este festival coa colaboración da Consellería de Cultura, Lingua e Xuventude da Xunta e dos diferentes concellos que acollen este evento.
Durante a súa celebración, cada noite haberá dous espectáculos en dúas vilas diferentes da provincia protagonizados en cada lugar por tres agrupacións, agás na cidade de Ourense e en Ribadavia onde actuarán os seis grupos.
Así, a programación desta edición comezará o 12 de agosto no Teatro Principal coa cerimonia inaugural e prolongarase ata o 21 de agosto con actuacións nas vilas do O Barco de Valdeorras, Celanova, Maceda, Verín, Entrimo, Viana, A Rúa, Allariz, Trives, Carballiño, Castro Caldelas, Xinzo, Manzaneda, Bande, ademais de Ourense cidade e Ribadavia.
Os encargados de espallar a súa música, baile e tradicións pola provincia de Ourense serán 173 artistas das seis agrupacións: Colombia (Fundación Ballet Folclórico de Nobsa Colombia), México (Ballet Folk. Instituto Tecnológico de Celaya), Panamá (Academia Andrés Valiente, Danzas y Proyecciones Folklóricas), Serbia (Kud Srem), Senegal (Ballet Jammu) e Taiwán (Yuan Yuan Dance Group).
O Centro Residencial Docente de Ourense e o IES Universidade Laboral serán as instalacións que acollerán aos grupos participantes durante a súa estadía na provincia.
Programa
– Luns, 12 de agosto. 20.30h. Cerimonia de inauguración – Teatro Principal de Ourense.
– Martes 13 de agosto. 20.30h. México – Senegal – Panamá – Claustro do mosteiro de Celanova.
– Martes 13 de agosto. 22.30h. Colombia -Taiwán – Serbia – Parque Malecón do Barco de Valdeorras.
– Mércores 14 de agosto. 22.30h. México – Senegal – Panamá – Rúa do Toural de Maceda.
– Mércores 14 de agosto. 22.30h. Colombia – Taiwán – Serbia – Praza Maior de Verín.
– Xoves 15 de agosto. 20.30h. Colombia – Taiwán – Serbia – Na Alameda de Entrimo.
– Xoves 15 de agosto. 22.30h. México – Senegal – Panamá – Praza Maior de Viana.
– Venres 16 de agosto. 22.30h. México – Senegal – Panamá – Parque do Aguillón da Rúa.
– Venres 16 de agosto. 22.30h. Colombia – Taiwán – Serbia – Campo da Barreira de Allariz.
– Sábado 17 de agosto. 22.30h. Colombia – Taiwán – Serbia – Rúa San Martín de Trives.
– Sábado 17 de agosto. 22.30h. México – Senegal – Panamá – Praza Maior do Carballiño.
– Domingo 18 de agosto. 20.00h e 20.30h – Colombia – Taiwán – Serbia – Desfile da praza do Toural á praza Carlos Casares e concerto na praza Carlos Casares.
– Domingo 18 de agosto. 22.30h. México – Senegal – Panamá – Praza do Prado de Castro Caldelas.
– Luns 19 de agosto. 20.30 h. Colombia – Taiwán – Serbia – Praza da Constitución de Bande.
– Luns 19 de agosto. 22.30 h. México – Senegal – Panamá – Patio do colexio de Manzaneda.
– Martes 20 de agosto. 22.30h e 23.00h – Colombia – Taiwán – Serbia – México – Senegal – Panamá – Desfile do parque de San Lázaro ata a praza Maior e concerto na praza Maior.
– Mércores 21 de agosto. 23.00h – Colombia – Taiwán – Serbia – México – Senegal – Panamá – Auditorio do Castelo de Ribadavia.
