O gran desfile celebrarase este 21 de febreiro pola tarde e repartiranse máis de 3.000 euros en premios.

O 21 de febreiro, Celanova acolle o seu xa tradicional Sábado de Piñata cun gran desfile na vila no que se pode participar de xeito individual, por parellas ou tríos, grupos (ata 15 persoas) e comparsas (máis de 15).

As inscricións no desfile poden facerse na oficina de turismo de Celanova (de 9 a 14 horas), no 988 43 22 01 ou en celanovacarnaval@hotmail.com, ata o venres 20 ás 2 da tarde.

Os participantes que acudan ao desfile con carrozas ou remolques deberán informar á organización das medidas dos mesmos no momento da inscrición, para que poida adoptar as correspondentes medidas de seguridade.  E para optar ao premio é preciso que o 90% do grupo complete o percorrido do desfile (que comeza na Predra da Moa, e continuará pola avenida López Blanco, rúa Emilia Pardo Bazán, praza Maior, rúa Fernández Losada, rúa Encarnación, avenida San Rosendo, rúa Celso Emilio Ferreiro, rúa Emilia Pardo Bazán e remate na praza Maior). Así mesmo, os participantes deben estar no comezo do desfile entre 15.30 e 16 horas, para proceder á súa colocación.

Cada comparsa terá un distintivo co seu nome e número de orde, na parte frontal da súa carroza.  Ademais, os participantes teñen prohibido levar animais soltos na comparsa, así como o uso de petardos, esprais ou lanzamento de obxectos perigosos ao público.

Máis de 3.000 euros en premios
As catro mellores comparsas recibirán premio. A primeira será agasallada con 1.000 euros, a segunda con 500, a terceira con 250 e a cuarta con 150 euros.

Ademais, haberá tres accésit para as comparsas da vila a cargo da Comisión de Festas de Celanova(de 150, 100 e 50 euros).
Os premios desta modalidade non poderán ser acumulativos, non podendo levar ningunha comparsa máis dun premio.

Así mesmo, os tres mellores grupos recibirán 300, 200 e 100 euros; as mellores parellas ou tríos, 120, 80 e 50 euros; e o mellor disfraz individual será agasallado con 50 euros. Será obrigatorio subir a recoller o premio disfrazado.