A mala racha do Pabellón Ourense de Liga Feminina 2 ademais de resultados comeza a ser en forma de lesións.
O Pabellón Ourense non sabe o que é a vitoria en toda esta tempada 2014-2015. De 16 partidos disputados, todos os conta por derrota. Dous equipos descenden de categoría e o conxunto ourensán ten todas as papeletas de ser un deles. Por enriba das pavillonistas, Valladolid e Oviedo con dúas vitorias. O Pabellón sabe o que é perder cos dous rivais, contra as pucelanas por partida dobre mentres que as asturianas aínda teñen que viaxar a Ourense na segunda volta. As pupilas de Benjamín Rodríguez deberían gañar tres partidos e que nin Valladolid nin Oviedo venzan en ningunha das seis xornadas que restan para o remate da Liga.
Lesións
A semana pasada Arantxa Mallou marchou cara Huelva para defender a camiseta, ata final de tempada, do Conquero, equipo que marcha terceiro na Liga Feminina.
Se esta ausencia fora un contratempo grande para as ourensás, a puntilla é a lesión de Andrea Ríos e de Sara García; ámbalas dúas sofren esguince de nocello, o que lles fará imposible a participación das dúas interiores no partido desta semana contra o Celta. Rodríguez contará tan só con seis xogadoras do primeiro equipo para afrontar este encontro. Por iso terá que levarse a xogadoras da canteira para completar a convocatoria.
