A AECT Eurocidade Chaves-Verín, en colaboración co Clube Cultural e Recreativo de Vilela do Tâmega de Chaves, organizou un encontro escolar dos centros educativos IES Castro de Baronceli e Colexio Nadir Afonso.
O obxectivo deste encontro promover o intercambio e a convivencia entre os estudantes dos dous centros educativos, a través da práctica conxunta de xogos populares.
Durante a xornada do xoves, preto de 30 alumnos do IES Castro DE Baronceli de Verín desprazáronse a Chaves para convivir cos alumnos do Colexio Nadir Afonso, onde tiveron a oportunidade de coñecer e practicar xogos populares realizados polos seus pais e avós, como son a ra, carreira de sacos, carreira dos pés atados, aro ou buxaina, entre outros. Ademais, a realización deste encontro senta as bases para a realización de futuros intercambios educativos entre o IES Castro de Baronceli e a agrupación de escolas Dr. Julio Martins del Municipio de Chaves.
Esta iniciativa lúdico-educativa, está enmarcada dentro do proxecto “European Medieval Sports & Street Games Network (Ga.M.E.S.Net)”, e ten por obxecto concienciar aos máis novos da necesidade de preservar os xogos tradicionais como símbolo de identidade histórica e patrimonio histórico-cultural deste territorio transfronteirizo.
