A proba será o sábado 30 a partir das 21 horas. A día de hoxe hai 1.208 persoas inscritas no circuíto «Correndo por Ourense».
Trala disputa da primeira das carreiras da quinta edición do Circuíto Correndo por Ourense no barrio do Vinteún, chega a quenda do barrio do Couto, este sábado a partir das 21 horas. Todas as persoas que desexen participar teñen de prazo ata o mércores para formalizar a súa inscrición nesta proba, na que a día de hoxe hai inscritas 1.208 persoas nas cinco categorías.
A do barrio do Couto será a única das probas do circuíto con horario nocturno. Así, dará comezo a partir das 21 horas cos pitufos, para continuar ás 21:10 cos benxamíns e alevíns, ás 21:15 h cos infantís e cadetes, e ás 21:30 h co resto das categorías.
Con saída na rúa Dalí, o circuíto percorrerá Ervedelo, Juan de Anges, Remedios, rotonda cara Antonio Puga, Ervedelo, Juan de Anges, Remedios e Dalí.
Seis probas
Tralas probas do Vinteún e O Couto, as seguintes citas son o 28 de xuño coa carreira do Centro, o 6 de setembro coa da Ponte, o 27 de setembro coa da Universidade e o 25 de outubro coa da Carballeira.
Premios e clasificacións
Todos os participantes e todas as participantes que estean na clasificación xeral por participar en 5 carreiras recibirán un agasallo, e os tres primeiros de cada categoría recibirán un trofeo. Na clasificación absoluta haberá dúas modalidades: 1º clasificado, trofeo e 300 euros de material deportivo; 2º clasificado, trofeo e 200 euros de material deportivo; 3º clasificado, trofeo e 100 euros de material deportivo. A entrega de trofeos e agasallos terá lugar o sábado 14 de novembro na cancha central do Pavillón dos Remedios.
Os interesados e interesadas en participar poden formalizar a súa inscrición -cuxo prezo é de sete euros para todo o circuíto- mediante a web www.deportesourense.com.
