Nos próximos días a Consellería de Medio Ambiente licitará un estudo para a mellora da penetración do transporte interurbano en Ourense.
A conselleira de Medio Ambiente,Territorio e Infraestruturas, Ethel Vázquez, reuniuse este martes con alcaldes dos oito municipios que conformarán nunha primeira fase a Área de Transporte Metropolitano de Ourense–Ourense, Coles, San Cibrao das Viñas, Punxín, Barbadás, O Pereiro de Aguiar, Toén e Amoeiro- para impulsar o Plan de Transporte Metropolitano.
Nesta xuntanza de traballo tamén estiveron presentes a directora xeral de Mobilidade, Helena de Lucas; e o delegado territorial da Xunta en Ourense, Rogelio Martínez.
Vázquez indicou que esta reunión tiña como obxecto impulsar e avanzar nun proxecto que todos, tanto a Xunta de Galicia como as corporacións municipais, consideran prioritario. Na xuntanza cos alcaldes analizáronse os pasos a seguir e fixouse un posible cronograma para a implantación do Plan de Transporte Metropolitano en Ourense. A conselleira anunciou a próxima licitación dun estudo para a mellora da penetración do transporte interurbano na cidade.
A titular de Infraestruturas explicou que a intención do Goberno galego é axilizar os trámites para dotar a cidade de Ourense e toda a súa área dun Plan de Transporte Metropolitano para que os cidadáns poidan gozar, canto antes, das vantaxes e dos descontos no transporte público dos que xa se benefician os habitantes das comarcas da Coruña, Ferrol, Santiago, Lugo e Vigo.
Preguntada polos problemas que nos últimos anos impediron que se puxera en marcha o transporte metropolitano, como informes da Policía Local, Ethel Vázquez expuxo que “a vontade real tanto do Concello de Ourense como da Xunta é a mellor garantía de éxito para que este plan sexa unha realidade”. Nesa liña, e ao respecto da ubicación dos intercambadiores dos buses interurbanos cos urbanos, a conselleira engadiu que “solución seguro que haberá, en calquera caso non foi problema nin en Vigo nin no resto de concellos”.
Tamén resaltou esa “vontade” o alcalde da cidade, Jesús Vázquez. “Temos que ir os oito concellos da man para tratar de chegar a puntos de encontro, baixo a tutela do traballo feito da Consellería”, afirmou o rexedor, para quen ubicar un intercambiador fóra da cidade “non vai ser práctico” nin tampouco sería útil que un usuario doutro municipio situado a 10 ou 15 quilómetros da capital “para penetrar na cidade tarda unha hora”. Ao seu xuízo, o transporte metropolitano “ten que dar un bo servizo, que non quede en papel mollado e que non o utilice nin a xente da capital nin a doutros concellos”.
Beneficios
Esta aposta polo transporte público mellorará a mobilidade dos veciños destes oito concellos, favorecendo un maior intercambio de viaxeiros, fundamentalmente coa cidade cabeceira, Ourense. Ademais, suporá o abaratamento do prezo do billete entre un 20 e un 50% para aquelas persoas que utilizan con frecuencia o transporte público; e reportaralle beneficios significativos aos usuarios, con aforros medios duns 600 euros ao ano.
O citado plan, ademais de fomentar un transporte público eficiente, que permite liberar espazo no centro da cidade, reduce a contaminación e contribúe a desconxestión e a unha maior fluidez nos tráficos.
Ethel Vázquez apuntou que con esta iniciativa desde a Xunta continúase avanzando un novo paso no obxectivo marcado de completar o mapa do transporte metropolitano nas sete cidades galegas. Deste xeito, os 8 concellos desta área e os seus 140.000 habitantes sumaranse a un Plan de Transporte Metropolitano do que xa se benefician 67 municipios galegos e preto de un millón e medio de cidadáns.
