As festas patronais desta parroquia de Barbadás, os días 8, 9 e 10 de agosto, tentan mesturar tradición e modernidade para abranguer unha ampla variedade de público.
San Lourenzo de Piñor, Barbadás, celebra a próxima fin de semana as súas festas patronais cun programa que combina tradición e modernidade e no que destacan os concertos de Sés e A Roda.
Unha mostra da aposta pola combinación de estilos está reflexada na apertura dos festexos coa presenza polas rúas do pobo de tres charangas o día 8 de agosto. Este pasarrúas comezará ás 19 horas do sábado e estará amenizado polas charangas BCB, XL e Fuego.
Tamén na liña da festa enxebre será a queimada popular oficiada polo Gran Bruxo da Costa da Morte, que estará acompañado polas charangas.
O colofón da festa para os amantes do máis puro estilo rockeiro será a partir das 00:30 da noite, coa actuación de María Xosé Silvar, Sés, intérprete con formación no baile e na música tradicional galega que xa ten gravado tres discos.
Ao remate do concertó de Sés actuará o grupo ourensán Gin Toni’s.
Na xornada do domingo, haberá concerto do tradicional grupo A Roda partir das 21:30 horas.
O público infantil tamén terá o seu espazo nas festas do San Lourenzo. O día 9 a partir das 18 horas haberá no Campo de Roma xogos para os cativos.
O día 10 retómase o sentido tradicional das festas co partido de solteiros e casados no campo da Chaira. Pola noite amenizarán os festexos a orquestra Costa Dorada e Grupo América.
