O premio, concedido pola Federación de Libreiros de Galicia, acada a terceira edición homenaxeando a relación entre a literatura e o cine.
A xornalista, escritora, guionista de televisión e de cine e actriz Elvira Lindo, recibirá dentro do Festival Internacional de Cine de Ourense o premio “Irmandade do Libro” na súa terceira edición, concedido pola Federación de Libreiros de Galicia para o mellor guión adaptado polo propio autor.
O premio recoñece así o labor da prolífica autora, que escribiu o guión para as películas “La primera noche de mi vida”, xunto a Miguel Albadalejo; “Manolito Gafotas” (personaxe que ela mesmo interpretou na radio); “Ataque verbal”, tamén con Albadalejo; “Plenilunio”, adaptación da novela de Antonio Muñoz Molina; ou “La vida inesperada”.
Ten no seu haber numerosos e recoñecidos premios, como o Nacional de Literatura Infantil, que lle foi concedido en 1998 por “Los trapos sucios de Manolito Gafotas”; igualmente, estivo nominada para o Goya ao mellor guión adaptado no ano 2000 por “Manolito Gafotas”
A distinción a Elvira Lindo é a terceira que se concede dentro do Festival Internacional de Cine de Ourense. A primeira foi para o escritor, director e guionista galego Angel de la Cruz, por “Enrugas”; a segunda, o pasado ano, recaeu en Carlos Bardem por “Alacrán enamorado”. O premio foi instituído para recoñecer a frutífera relación entre cine e literatura, que ten permitido crear filmes de calidade e que teñen acadado gran éxito.
A entrega terá lugar o próximo día 15 de novembro, segunda xornada do Festival, no transcurso dun acto a celebrar no Teatro Principal.
