A deputada do BNG, Tereixa Paz cualificou de “discriminación intolerábel” para as persoas usuarias a supresión da viaxe Ourense-Santiago ás 10.30 horas e salientou que dende as 17:25 até as 20:30, “non hai forma de voltar cara Ourense”. Ademais, engadiu que polas mañás dende as 7:55 até as 12:10 tampouco existe comunicación de Ourense a Santiago polo que preguntou ao Goberno que actuacións ten previstas para a reposición dos servizos así como unha adecuación nas frecuencias, horarios e prezos asumibles.
Pola súa parte, a directora de Mobilidade, Elena de Lucas asegurou que as tarifas foron conxeladas para o ano 2016 e os cambios débense a “reorganización de RENFE” e as frecuencias e as tarifas están establecidas polo Ministerio de Fomento. Por outra parte, explicou que aumentaron os servizos, Olmedo-Zamora, León-Zamora, e foron incrementados tamén en seis servizos as liñas Ourense-Madrid. Elena de Lucas afirmou que as liñas en Galiza están a mellorar de maneira notable.
A parlamentaria lamentou a resposta da directora de Mobilidade da que dixo, deduzo que o Goberno galego “non ten previsto reclamar a reposición dos servizos ferroviarios eliminados”. Tereixa Paz reiterou que foron eliminadas frecuencias de Ourense a Santiago e resulta que as persoas que habitan en Ourense, explicou, “necesitamos uns servizos de ferrocarril máis adecuados porque utilizamos o servizo a Santiago para traballar e estudar e as liñas que foron incrementadas están fora de Galiza”.
A deputada ironizou sobre o incremento dos servizos, Olmedo-Zamora ou León-Zamora dos que dixo, “en Ourense estamos que lo petamos” pero resulta que nós necesitamos viaxar entre Ourense e Santiago e vostede “mándanos a Madrid”.
