O grupo municipal Ourense en Común comezou a finais de febreiro un roteiro para achegar o novo PXOM por todos os barrios do Concello de Ourense. Neste tempo os concelleiros Martiño Xosé Vázquez e Miguel Doval, xunto co labor de case unha ducia de persoas voluntarias para a coordinación dos eventos, achegaron o documento a zonas como A Carballeira, As Camelias, O Polvorín, Seixalbo, A Cuña, Mariñamansa, Montealegre, O Couto, Lagoas, San Francisco e Canedo entre outras. Este xoves 14 de abril é a quenda do rural ourensán. A cita será ás 20h na Asociación de Veciños de Palmés.
“O noso obxectivo foi visitar semanalmente dúas zonas do Concello de Ourense para transmitir o modelo de cidade pretendida polo novo PXOM, responder ás posibles dúbidas existentes e informar de primeira man á veciñanza do estado de aprobación do documento. Acción que debería partir do propio equipo de goberno do Partido Popular para facer este documento o máis estable, transparente e participado posible. Pois ninguén debería querer volver a cometer erros pasados como o seu propio PXOM tombado pola xustiza.”
Dende Ourense en Común insisten en que este PXOM non é o que houberan desexado pois consideran deficiente a coñecida como Fase de Avance na que o equipo redactor recolle impresións, suxestións e demandas veciñais. Carencia que teñen comprobado nestes mesmos encontros nos barrios.
“Hai un claro descoñecemento entre a veciñanza de que cidade se pretende con este plan. É algo que vimos confirmando en todos e cada un dos barrios visitados. Os veciños de Seixalbo, A Cuña ou San Francisco non son conscientes das posibilidades da liberación do corredor ferroviario coa chegada da alta velocidade, os veciños do Polvorín, As Camelias ou A Carballeira non foron informados do por que sería necesario un desdobre tipo Ronda Bulevar, ninguén lles explicou aos veciños de Montealegre porque é necesario un plan especial na zona, ou que solución se aporta no plan ao problema de accesibilidade ao Parque Botánico. As veciñas das Lagoas descoñecen a futura conexión co parque de Oira ou as veciñas de Canedo descoñecen por onde discorrerá a Variante Norte. Que clase de cidade queremos construír así?”.
Para OUeC o «máis grave» é «que siga sen existir vontade por parte do equipo de goberno de comunicar persoalmente o resultado motivado das alegacións. Somos nós os que estamos facendo un traballo de mediación entre veciños e Concello de Ourense, función que non nos corresponde nin estamos cualificados para tal pero que seguiremos facendo namentres o Partido Popular non se responsabilice”.
