A localidade alacantina de Benidorm acolle do 3 ao 7 de decembro o Campionato de España de xadrez por equipos, pertencente ás categorías Sub-18 (Xuvenil) e Sub-12 (Alevín), sendo estas as dúas únicas categorías precedentes á sénior, no que a competicións nacionais oficiais por equipos refírese. Nesta edición 2016, son 27 as escuadras presentes de toda España na competición xuvenil e 25 as que se congrega na categoría sub-12 (alevín).
O Club Xadrez Ourense está representado en ambos os campionatos de España con dous equipos, o de categoría xuvenil composto por Adrián Gómez, Gabriel Roma, Martín Gómez, Alejandro Cervigni e Federico Naso e o equipo alevín composto por Xacobe Conde, Marcos Vázquez, Adrián Vázquez Velasco e Laura Gómez, todos eles acompañados polo técnico Elías José González.
En categoría xuvenil os ourensanistas conseguiron vencer dous dos seus tres encontros, na primeira xornada ante o Club Xadrez Piélagos (Cantabria) por un contundente 1-3 e na xornada do luns por idéntico resultado, 3-1 ante os murcianos do «Ajedrez Lapuerta».
Ademais destas dúas vitorias o equipo xuvenil estivo a piques de dar a sorpresa fronte ao nº 1 do ranking, o Club de Ajedez Cerdanyola (Catalunya), ao perder por un apertado 2.5 a 1.5, nun encontro no que houbo moitas chances de igualar a contenda e mesmo de vencela. Claro exemplo foron as táboas logradas por Gabriel Roma ante o potente xogador catalán Llatzer Brú, quen estivo a un só segundo de perder a súa partida por tempo ante o ourensán, neste mesmo match, destacou a impecable vitoria de Adrián Gomez ante un dos mellores xogadores do torneo, Alejandro Domingo, (2317 puntos de ranking internacional).
Na categoría alevín (sub-12), destacan as dúas vitorias acumuladas polos ourensáns ante o Valladolid Promesas e o «Escuela Xaquedrum», ambas as por un apertado pero valioso 2.5 a 1.5. O único encontro no que os do Xadrez Ourense caeron, foi ante o poderoso conxunto Andaluz do «Bargas Fundación Soliss».
A próxima xornada medirá aos xuvenís do Ourense ante os manchegos do Club Xadrez Europa e aos alevíns ante os Navarros do Club Xadrez Oberena.
