Gran final de ano para o Club Natación Pabellón Ourense. O club ourensán logrou facerse co campionato absoluto en categoría masculina logo de remontar na última das tres xornadas disputadas.
A derradeira xornada disputouse cunha gran tensión até o desenlace, xa que o título masculino rotábase entre o Arzúa, Galaico e Pabellón Ourense, ata que na última substitución da xornada estes últimos lograban unha vantaxe de dous puntos para o título masculino.
Ao longo da sesión, o CNPO rendeu a un nivel espectacular, tirando de calculadora e de épica á hora de colocar aos nadadores nas diferentes finais; e estes, non fallaron.
Nas probas que determinarían aos gañadores os ourensáns fixeron o necesario para levarse o título. Así, no hectómetro de crol Marcos García realizou o seu rexistro persoal e lograba a sexta posición, sendo o mellor da súa categoría, mentres que os seus compañeiros Miguel Pimentel e Antón Rodríguez eran cuarto e quinto, respectivamente, na final B.
Nos 50 metros braza, o capitán Alberto Taboada, alzouse co bronce onde as décimas de segundo decidiron o pódium. David González gañaba a final B.
Nos 200 costas Jacobo Caride mellorou a marca provincial de 16 anos con mínima nacional incluída e tocaba a parede en sexto lugar, seguido doutro ourensán, José Moure que finalizou décimo cuarto, logrando puntos moi valiosos.
En 200 estilos, Alberto Taboada coroouse subcampión galego, mentres co seu compañeiro Jacobo Caride era segundo da final B.
O desenlace do campionato deuse na proba da substitución de estilos na que os homes foron quintos.
Mulleres
O subcampionato na categoría mixta, tamén foi gracias aos resultados das mulleres.
Uxía Gómez lograba a oitava praza na final B dos 100 metros de crol mellorando a súa mellor marca; nos 200 costas, Paula Blanco e Luz Fernández eran segunda e quinta, respectivamente, na final B; en 200 estilos, Ana Santiso finalizaba sétima e o estilos relevo mulleres eran oitavas.
Unha vez finalizada a competición, o adestrador Daniel Toro, mostraba a súa satisfacción polo nivel dos seus deportistas ao longo de tres días dun duro campionato, onde «soubemos dar un paso á fronte e demostrado o potencial dun equipo novo que en breve serán os que tiren do equipo. Deron a cara en todo momento e non cometemos erros que nos restasen», afirmaba Toro.
